Ekzosoma nima va teriga qanday taʼsir qiladi
Ekzosomalar hujayralar ajratib chiqaradigan mikroskopik pufakchalar. Ichida oqsillar, lipidlar va RNK boʻlaklari bor. Hujayralar ular orqali bir-biriga signal beradi: masalan, yangilanishni boshlash yoki yalligʻlanishni pasaytirish kerakligi haqida. Kosmetologiyada ekzosomalardan terining oʻz tiklanish jarayonlarini qoʻllab-quvvatlash uchun foydalaniladi.
Klinikada ASCE+ SRLV (Koreya, ExoCoBio) bilan ishlaymiz. Ishlab chiqaruvchi ekzosomalarni oʻzining ExoSCRT texnologiyasi bilan ildiz hujayralar oʻstirilgan muhitdan ajratib oladi. Preparat quruq kukun (liofilizat) holida keladi va muolaja oldidan maxsus eritma bilan aralashtiriladi. Nomidagi SRLV teri uchun moʻljallangan versiya ekanini bildiradi. Preparat tarkibida tirik hujayralar yoʻq.
Ekzosomalar filler emas: hajm qoʻshmaydi, yuz shaklini oʻzgartirmaydi. Ularning vazifasi teri sifati: rang, tekstura, namlik va himoya qatlami.
Kimga mos keladi va qachon boshqa muolaja kerak
Ekzosoma terapiyasini teri tiklanishi va tinchlanishi kerak boʻlganda tanlaymiz: u sezgir, tez qizaradigan, xira yoki notekis teriga mos keladi. Yoshdan koʻra teri holati muhimroq, shuning uchun qarorni koʻrikdan keyin qabul qilamiz.
Asosiy koʻrsatmalar:
- xira, charchagan koʻrinadigan teri;
- notekis tekstura;
- tez qizaradigan, sezgir teri;
- quruqlik va tortishish hissi, zaiflashgan himoya qatlami;
- akne izlari: asosiy davolashga qoʻshimcha sifatida;
- yozgi quyosh va quruq havodan keyin qurigan, qizargan teri.
Erkaklar uchun ham muolaja xuddi shunday oʻtadi.
Ekzosomalar qachon yetarli emas
Ekzosomalar chuqur ajinlarni, yoʻqolgan hajmni va tushgan yuz ovalini tuzatmaydi. Mimik ajinlar uchun botoks, hajm uchun konturli plastika, terini zichlashtirish uchun biostimulyatorlar mos keladi. Faol akne boʻlsa, avval yalligʻlanishni tinchlantiramiz. Sizga nima kerakligini kosmetolog konsultatsiyasida aniqlaymiz.
Soch uchun ekzosomalar
Soch toʻkilsa yoki siyraklashsa, preparatning boshqa versiyasi, ASCE+ HRLV ishlatiladi. U haqida soch mezoterapiyasi sahifasida yozganmiz.
Ekzosomalar, biorevitalizatsiya yoki polinukleotidlar: farqi nimada
Uchala muolaja ham teri sifatini yaxshilaydi, lekin asosiy vazifasi har xil: ekzosomalar koʻproq tiklanish va tinchlanishga, biorevitalizatsiya namlikka, polinukleotidlar teri zichligiga taʼsir qiladi. Koʻrikda teri qalinligi, qizarish, namlik va akne izlariga qaraymiz, keyin bitta muolajani yoki ularning birikmasini taklif qilamiz.
| Muolaja | Asosiy taʼsiri | Qachon tanlaymiz |
|---|---|---|
| Ekzosomalar (ASCE+ SRLV) | Tiklanish, yalligʻlanishni tinchlantirish | Sezgir, tez qizaradigan teri, notekis tekstura |
| Biorevitalizatsiya | Chuqur namlik, yorqinlik | Suvsizlangan, xira teri |
| Polinukleotidlar (Rejuran) | Zichlik, tiklanish | Yupqa teri, akne izlari, koʻz osti |
| Plazmoterapiya | Oʻz plazmangizdagi oʻsish omillari | Oʻz qoningizdan tayyorlangan vositani afzal koʻrsangiz |
Har biri haqida alohida sahifa bor: biorevitalizatsiya, polinukleotidlar va plazmoterapiya. Plazmoterapiyadan farqi: ekzosomalar tayyor preparat, sizdan qon olinmaydi.
ASCE+ SRLV narxi shu sahifadagi jadvalda, boshqa xizmatlar narxi narxlar sahifasida.
Ekzosoma terapiyasi qanday oʻtadi
Muolaja odatda 40-60 daqiqa davom etadi, vaqtning katta qismi anestetik krem taʼsir qilishini kutishga ketadi. Preparat ingichka igna bilan, mezoterapiyadagi kabi koʻp nuqtaga kiritiladi: yengil sanchish seziladi, lekin krem tufayli noqulaylik odatda kam boʻladi.
- Koʻrik va suhbat: teri holatini baholaymiz, qarshi koʻrsatmalarni tekshiramiz.
- Yuzni tozalaymiz va 20-30 daqiqaga anestetik krem surtamiz.
- Teriga antiseptik bilan ishlov beramiz.
- Liofilizatni eritma bilan aralashtirib, preparatni kichik dozalarda kiritamiz.
- Oxirida tinchlantiruvchi vosita surtamiz va uyda qanday parvarish qilishni tushuntiramiz.
ASCE+ mikronidling bilan ham qoʻllanadi: mayda ignalar terida mikrokanallar ochadi, ekzosomalar shundan keyin surtiladi. Sizga qaysi usul mos, koʻrikda hal qilamiz.
Muolajaga qanday tayyorlanish kerak
Maxsus tayyorgarlik kerak emas. Bir kun oldin spirtli ichimlik ichmang, shunda koʻkarish ehtimoli kamayadi. Doimiy ichadigan dorilaringizni oʻzingiz toʻxtatmang, ularni koʻrikda ayting. Yuzda gerpes yoki yalligʻlanish chiqib qolsa, oldindan xabar bering, muolajani boshqa kunga koʻchiramiz. Pardozsiz kelsangiz, vaqt tejaladi.
Natija va kurs: necha seans kerak
Ekzosomalar bir martalik effekt uchun emas, kurs bilan ishlaydi: odatda 3-5 seans, 2-4 hafta oraliq bilan. Oʻzgarish asta-sekin seziladi: teri tinchroq, tekisroq va yorqinroq koʻrina boshlaydi. Oʻzgarishni kurs oxirida baholash toʻgʻriroq.
Natija qancha saqlanishi boʻyicha ishonchli maʼlumot hali yoʻq, u yosh, teri holati va uydagi parvarishga ham bogʻliq. Kurs tugagach, qoʻllab-quvvatlovchi seanslar kerakmi va qanday oraliqda, koʻrikda birga hal qilamiz. Natija har kimda har xil boʻladi.
Boshqa muolajalar bilan birga
Ekzosomalarni biorevitalizatsiya yoki polinukleotidlar bilan bitta rejada navbatma-navbat qilish mumkin. Piling va yuzni tozalash (chistka) odatda inʼeksiyadan 1-2 hafta oldin yoki keyin rejalashtiriladi. Keraksiz muolajalarni qoʻshmaymiz: reja terining ehtiyojidan kelib chiqadi.
Qaysi faslda qilgan maʼqul
Ekzosoma terapiyasi piling kabi teri yuzasini koʻchirmaydi, shuning uchun uni yil boʻyi qilish mumkin. Yozda muolajadan keyingi birinchi kunlarda ochiq quyoshda yurmang va SPF surting. Kuz esa Toshkentning issiq va quruq yozidan keyin terini tiklash uchun qulay vaqt.
Muolajadan keyin: tiklanish va parvarish
Koʻpchilik ertasi kuni odatdagi ishiga qaytadi. Yengil qizarish koʻpincha bir kunda ketadi, igna nuqtalarida kichik doʻmboqchalar va mayda koʻkarishlar qolishi mumkin. Oldinda toʻy yoki boshqa muhim tadbir boʻlsa, muolajani kamida 7-10 kun oldin qiling.
Birinchi 2-3 kunda:
- birinchi kuni pardoz qilmang;
- yuzni ishqalamang va massaj qilmang;
- sauna, hammom, basseyn va ogʻir sportdan voz keching;
- kislotali va retinolli vositalarni vaqtincha toʻxtating;
- har kuni SPF 50 surting.
Uydagi parvarish oddiy boʻlsin: yumshoq tozalovchi vosita, namlantiruvchi krem va SPF. Yangi faol vositalarni bu kunlarda sinab koʻrmang.
Qizarish yoki shish bir necha kundan keyin ham ketmasa, bizga qoʻngʻiroq qiling.
Qarshi koʻrsatmalar
Ekzosoma terapiyasi homiladorlik va emizish davrida, yuzda faol yalligʻlanish, isitma yoki onkologik kasallik boʻlganda qilinmaydi. Bu holatlarni koʻrikda albatta soʻraymiz. Toʻliq roʻyxat:
- homiladorlik va emizish davri;
- muolaja hududida faol yalligʻlanish: gerpes, akne qoʻzishi, dermatit;
- isitma yoki oʻtkir kasallik;
- preparat tarkibiga allergiya;
- faol autoimmun kasallik;
- onkologik kasalliklar;
- keloid chandiqlarga moyillik.
Qon ivishi buzilgan boʻlsa yoki qonni suyultiruvchi dori ichsangiz, buni koʻrikda albatta ayting: muolaja mumkinmi, alohida hal qilamiz.
