Mezoterapiya nima va biorevitalizatsiyadan farqi
Mezoterapiyada faol moddalar kokteyli juda ingichka igna bilan teriga oz-ozdan, koʻp nuqtaga kiritiladi. Tarkibida vitaminlar, aminokislotalar, peptidlar, antioksidantlar va gialuron kislotasi boʻladi. Ular krem yetib bormaydigan qatlamga tushadi va aniq bir muammo ustida ishlaydi. Koʻpchilik uni qisqa qilib «meza» yoki «yuzga vitamin ukol» deydi, lekin kokteyl tarkibi faqat vitaminlardan iborat emas.
Biorevitalizatsiya bilan farqi tarkibda. Biorevitalizatsiyada asosiy modda gialuron kislotasi, u eng avvalo terini namlaydi. Mezoterapiyada esa koʻp komponentli kokteyl muammoga qarab tanlanadi: pigment, xira rang, koʻz atrofi yoki yuz ovali. Ikkala muolaja bir-birini toʻldiradi, shuning uchun koʻpincha bitta rejaga birga kiritiladi.
Mezoterapiya hajm qoʻshmaydi va yuz shaklini oʻzgartirmaydi. Uning vazifasi teri holatini yaxshilash: rang tekislanadi, teri tiniqroq boʻladi, yuz dam olgandek koʻrinadi.
Qaysi joylarga qilinadi:
- butun yuz;
- koʻz atrofi;
- yuz ovali va yuzning pastki qismi;
- boʻyin va dekolte.
Soch toʻkilishi va bosh terisi uchun alohida muolaja bor: soch mezoterapiyasi.
Kimga mos keladi va qachon boshqa muolaja kerak
Mezoterapiya teri xiralashganda, rangi notekis boʻlib qolganda va qarishning ilk belgilari paydo boʻlganda mos keladi. Bunda yosh emas, teri holati hal qiladi: muolaja 25 yoshda ham, 45 yoshda ham kerak boʻlishi mumkin.
Koʻpincha shunday holatlarda tavsiya qilinadi:
- yaxshi uxlasangiz ham yuz charchagan koʻrinadi;
- yozdan keyin pigment dogʻlari va notekis rang qolgan;
- akne oʻtgan, lekin izlari hali bor;
- koʻz ostida qora doiralar va ertalabki shish bor;
- mayda ajinlar paydo boʻlgan, teri quruqlashgan;
- lazer yoki pilingdan keyin teri tezroq tiklanishi kerak.
Mezoterapiya hamma muammoni hal qilmaydi. Peshona va qosh orasidagi mimik ajinlarga botoks yordam beradi. Yoʻqolgan hajmni konturli plastika tiklaydi. Teri sezilarli boʻshashgan boʻlsa, biostimulyatorlar yoki mezonitlar haqida gaplashamiz. Sizga qaysi yoʻl toʻgʻri kelishini konsultatsiyada ochiq aytamiz.
Mezoterapiya turlari: qaysi preparat qachon kerak
Preparatni teri koʻrigidan keyin, muammoga qarab tanlaymiz. Asosiy preparatlar: amerikalik ABG Lab kompaniyasining Meso liniyasi va yaponiyalik Curacen. Narxlar jadvalda flakon hajmi bilan koʻrsatilgan.
| Preparat | Qisqacha | Qachon tanlaymiz |
|---|---|---|
| Meso-Wharton P199 (AQSh) | peptidlar, gialuron kislotasi, vitaminlar | 30 yoshdan keyingi teri: mayda ajinlar, quruqlik, tarangligi pasaygan; lazer yoki pilingdan keyin tiklanish |
| Meso-Xanthin F199 (AQSh) | fukoksantin (dengiz oʻtlaridan olinadigan antioksidant), gialuron kislotasi, peptidlar | quyosh taʼsirida qarigan teri, pigment, notekis rang, akne izlari, xira teri |
| Meso-Eye (AQSh) | koʻz atrofi uchun kokteyl | qora doiralar, shish, mayda ajinlar |
| Meso-Sculpt (AQSh) | yuz ovali uchun kokteyl | yuzning pastki qismidagi yengil shish, oval aniqligi pasaygan |
| Curacen (Yaponiya) | platsenta gidrolizati | xira, charchagan teri; piling yoki lazerdan keyingi tiklanish |
Meso-Sculpt natijasi yengil: oval biroz aniqroq koʻrinishi mumkin, lekin tushgan konturni koʻtarmaydi. Bunday holatda boshqa yoʻlni taklif qilamiz.
Jadvalda Skin E Anti-Age va Amber Power ham bor. Ularni kosmetolog teri holatiga qarab tavsiya qiladi.
Kokteyl qoʻlda yoki mezoinjektor bilan kiritiladi. Mezoinjektor preparatni bir tekis va tezroq tarqatadi. Uning ignalari sarf materiali, shuning uchun jadvalda alohida qatorda turadi.
Qancha preparat kerakligini ham koʻrikdan keyin aytamiz. Ortiqchasini taklif qilmaymiz.
Muolaja qanday oʻtadi
Muolaja odatda 40-60 daqiqa davom etadi, shundan 20 daqiqacha anestetik krem taʼsir qilishini kutamiz. Sezgi qisqa va chidasa boʻladigan darajada, eng sezgir joy koʻz atrofi.
- Konsultatsiya. Kosmetolog terini koʻrib chiqadi, sogʻligʻingiz va ichayotgan dorilaringiz haqida soʻraydi, preparat va zonani tanlaydi.
- Tayyorlash. Pardoz olib tashlanadi, teri tozalanadi, anestetik krem surtiladi.
- Inʼeksiyalar. Preparat kerakli zonalarga mayda dozalarda yuboriladi, qoʻlda yoki mezoinjektor bilan.
- Yakun. Teri antiseptik bilan artiladi, uyda parvarish boʻyicha tavsiyalar beriladi.
Inʼeksiya joylarida mayda boʻrtiqlar va qizarish qoladi. Boʻrtiqlar preparat qayerga kiritilganini koʻrsatadi va u soʻrilgani sari tekislanadi: odatda 1-2 kunda, Meso-Xanthin F199 preparatidan keyin 2-3 kunda.
Muolajadan oldin
- 2-3 kun oldin spirtli ichimlik ichmang: koʻkarish ehtimoli kamayadi.
- Bir hafta oldin piling va skrab qilmang, agar kosmetolog boshqacha demagan boʻlsa.
- Lab atrofida tez-tez uchuq (gerpes) chiqsa, oldindan ayting.
- Qon suyultiruvchi dori ichsangiz, uni oʻzingiz toʻxtatmang, konsultatsiyada ayting.
Natija va kurs: necha seans kerak
Mezoterapiya kurs bilan qilinadi. Birinchi seansdan keyin teri tetikroq koʻrinishi mumkin, barqaror natija esa kurs oxirida boʻladi. Kurs koʻpincha 4-6 seans, oraligʻi odatda 1-2 hafta.
Preparatlar boʻyicha odatiy sxemalar:
- Meso-Wharton P199: 4-8 seans, 1-2 hafta oraliq bilan;
- Meso-Xanthin F199: 4-6 seans;
- Curacen: natija odatda 3-5 seansdan keyin seziladi, keyin 4-6 oyda bir marta qoʻllab-quvvatlovchi seans;
- Meso-Eye va Meso-Sculpt: sxemani kosmetolog zona va teri holatiga qarab tuzadi.
Kurs oxiriga kelib odatda quyidagilar seziladi:
- rang tekisroq, pigment dogʻlari ochroq;
- teri namroq va silliqroq;
- akne izlari kamroq koʻrinadi;
- koʻz atrofi tetikroq.
Natija qancha saqlanishi yosh, teri holati, quyoshdan himoya va uydagi parvarishga bogʻliq, har kimda har xil boʻladi. Aniq rejani teringizni koʻrib tuzamiz.
Pigmentga qarshi kursni Toshkentda kuz yoki qishda boshlash qulay: quyosh yumshoqroq, natijani saqlash osonroq. Oldinda toʻy yoki boshqa muhim tadbir boʻlsa, seansni undan kamida 7-10 kun oldin qiling.
Mezoterapiyadan keyin: parvarish va cheklovlar
Mezoterapiyadan keyin 1-2 kun terini tinch qoʻying. Boʻrtiqlar odatda 1-3 kunda, koʻkarish boʻlsa, bir necha kunda oʻtadi.
- 24-48 soat pardoz qilmang, yuzni ishqalamang va massaj qilmang.
- Kamida 2-3 kun sauna, hammom, basseyn va ogʻir sportdan saqlaning.
- Birinchi kunlari spirtli ichimlik ichmang: u shish va koʻkarishni kuchaytirishi mumkin.
- Har kuni SPF krem surting, ikki hafta solyariyga bormang.
- Piling, lazer va apparat muolajalarini kosmetolog bilan kelishib rejalashtiring.
Odatiy reaksiyalar: qizarish, yengil shish, boʻrtiqlar va inʼeksiya joyida koʻkarish. Ular odatda oʻz-oʻzidan oʻtadi. Shish kuchaysa, ogʻriq ortsa yoki harorat koʻtarilsa, kutib oʻtirmang, klinikaga qoʻngʻiroq qiling.
Kimga mumkin emas: qarshi koʻrsatmalar
Mezoterapiya homiladorlik va emizish davrida, shuningdek muolaja zonasida yalligʻlanish boʻlsa qilinmaydi. Asosiy qarshi koʻrsatmalar:
- homiladorlik va emizish davri;
- inʼeksiya joyida yalligʻlanish: gerpes, qoʻzigan akne, dermatit;
- shamollash, isitma yoki boshqa oʻtkir kasallik;
- preparat tarkibiga allergiya;
- faol autoimmun kasallik;
- onkologik kasallik;
- keloid chandiq hosil boʻlishiga moyillik.
Gormonga bogʻliq kasalliklar boʻlsa, platsenta asosidagi Curacen oʻrniga boshqa preparat tanlanadi. Qon ivishi buzilgan boʻlsa yoki qon suyultiruvchi dori ichsangiz, avval davolovchi shifokoringiz bilan maslahatlashing. Ichayotgan barcha dorilaringizni konsultatsiyada aytib qoʻying.
