Botoks nima va qanday ishlaydi
Botoks yoki botulinoterapiya bu mimik mushaklarga A tipidagi botulotoksinni juda kichik dozada yuborish. Botulotoksin nerv uchidan mushakka boradigan signalni vaqtincha toʻsadi. Mushak bir necha oyga boʻshashadi, uning ustidagi teri burishmay qoʻyadi va ajin tekislanadi. Keyin taʼsiri asta-sekin tugaydi va mushak yana ishlay boshlaydi.
Yuzning yuqori qismidagi ajinlarning koʻpi mimikadan paydo boʻladi. Har gal qovoq solganingizda yoki kulganingizda teri bir xil joyda burishadi. Yillar oʻtib bu burma yuz tinch turganda ham koʻrinib qoladi. Botoks shu harakatni susaytiradi: ajinlar chuqurlashmaydi, borlari esa yumshaydi.
Botox aslida bitta preparatning savdo nomi, odamlar esa butun muolajani shunday atashadi. Biz uchta preparat bilan ishlaymiz: Vistabel (Allergan, AQSh), Neuronox (Medytox, Janubiy Koreya) va Dysport (Ipsen, Fransiya). Vistabel tarkibidagi molekula Botox bilan bir xil: bu oʻsha preparatning estetik kosmetologiya uchun chiqarilgan nomi.
Soch uchun «botoks» deb ataladigan muolajalarning bunga aloqasi yoʻq: ularda botulotoksin boʻlmaydi, bu oddiy soch parvarishi.
Yuzning qaysi joylariga botoks qilinadi
Botoks asosan peshona, qosh orasi va koʻz chetidagi mimik ajinlar uchun qilinadi, Vistabel yoʻriqnomasida aynan shu uch zona koʻrsatilgan. Ajinlar endigina bilina boshlagan boʻlsa, botoks ularning chuqurlashishini sekinlashtiradi. Yuzning boshqa joylariga qilish mumkinmi, buni kosmetolog yuzingiz va mimikangizni koʻrib aytadi.
Ajin chuqur boʻlib, yuz tinch turganda ham koʻrinsa, botoks uni yumshatadi. Toʻliq tekislash uchun esa boshqa muolaja ham kerak boʻlishi mumkin.
Botulinoterapiya qilinadigan zonalar:
- peshonadagi koʻndalang ajinlar;
- qosh orasidagi tik burmalar;
- koʻz chetidagi mayda ajinlar;
- burun ustidagi ajinlar;
- iyak va lab burchaklari;
- chaynov mushaklari: jagʻ doim zoʻriqib tursa yoki yuzning pastki qismi keng koʻrinsa;
- boʻyin.
Qoʻltiq osti, kaft va oyoq tagidagi kuchli terlashda ham botulotoksin ishlatiladi. Bu haqda alohida sahifa bor: terlashni davolash (giperhidroz).
Botoks hajm qoʻshmaydi: yoʻqolgan hajmni va chuqur burun-lab burmalarini toʻldirmaydi. Koʻpincha «lab botoks» deb soʻrashadi, lekin labga hajmni botoks emas, filler beradi. Bunday holatlar uchun konturli plastika va lablarni kattalashtirish bor. Teri xira va quruq boʻlsa, biorevitalizatsiya toʻgʻriroq tanlov. Sizga nima mosligini konsultatsiyada ochiq aytamiz.
Botoks narxi va preparatlar: Vistabel, Neuronox, Dysport
Botoks narxi ikki narsaga bogʻliq: preparatga va birliklar soniga. Jadvalda har bir preparatning bir birligi narxi koʻrsatilgan. Zonaga necha birlik ketishini kosmetolog mimikangizni koʻrib aytadi, umumiy summani esa muolajadan oldin bilasiz.
Uchala preparat ham A tipidagi botulotoksin va bir xil ishlaydi. Farqi ishlab chiqaruvchida va dozalashda. Preparatni zona, mushak kuchi, avvalgi tajribangiz va byudjetingizga qarab birga tanlaymiz.
| Preparat | Ishlab chiqaruvchi | Nimasi bilan farq qiladi |
|---|---|---|
| Vistabel | Allergan, AQSh | Molekulasi Botox bilan bir xil. Yevropada qosh orasi, peshona va koʻz chetidagi ajinlar uchun roʻyxatdan oʻtgan |
| Neuronox | Medytox, Janubiy Koreya | Koreyada Meditoxin nomi bilan sotiladi. Qosh orasidagi ajinlar boʻyicha klinik tadqiqotda Botox bilan solishtirilgan |
| Dysport | Ipsen, Fransiya | Birligi boshqacha hisoblanadi, bir zonaga koʻproq birlik ketadi. Sigir suti oqsiliga allergiyada qilinmaydi |
Turli preparatlarning birligi bir-biriga teng emas. Masalan, qosh orasi uchun Vistabel yoʻriqnomasida 20 birlik, Dysport yoʻriqnomasida 50 birlik yozilgan. Shu sababli Dysport birligining narxi pastroq. Bir birlik narxini emas, umumiy summani solishtiring.
Jadvaldagi Dysport 300 va Dysport 500 bir xil preparat, faqat flakondagi birliklar soni har xil.
Bir-ikki zona uchun odatda birlik bilan hisoblash qulayroq. Yuzning bir nechta zonasini birdan qilmoqchi boʻlsangiz, Neuronox yoki Dysport bilan «Butun yuz (Full Face)» varianti bor: narxi oldindan belgilangan. Unga qaysi zonalar kirishini konsultatsiyada aniq aytamiz.
Botoks qilish jarayoni
Muolaja odatda 15-30 daqiqa davom etadi, inʼeksiyalarning oʻzi esa bir necha daqiqa oladi. Igna juda ingichka, har bir inʼeksiya bir soniyacha davom etadi va qisqa chimchilagandek seziladi. Odatda anesteziya kerak boʻlmaydi.
- Konsultatsiya. Kosmetolog sogʻligʻingiz, ichayotgan dorilaringiz va avval qilingan inʼeksiyalar haqida soʻraydi, qarshi koʻrsatmalarni tekshiradi.
- Mimikani baholash. Sizdan qovoq solish, jilmayish va qoshni koʻtarishni soʻraymiz. Shunda qaysi mushak qanchalik kuchli ishlashi koʻrinadi.
- Reja. Zonalar, nuqtalar va birliklar soni belgilanadi. Umumiy summani muolajadan oldin bilasiz.
- Inʼeksiyalar. Teri antiseptik bilan artiladi, preparat bir nechta nuqtaga yuboriladi.
- Nazorat. Taxminan 2 haftadan keyin natijani birga koʻramiz va kerak boʻlsa korreksiya qilamiz.
Inʼeksiya joylarida mayda boʻrtiqlar qoladi, ular odatda 15-30 daqiqada yoʻqoladi. Muolajadan keyin darhol ishingizga qaytishingiz mumkin.
Muolajaga qanday tayyorlanish kerak
- toʻy yoki boshqa muhim tadbir boʻlsa, botoksni kamida 2 hafta oldin qiling: toʻliq natija shu muddatda koʻrinadi;
- qon suyultiruvchi dori ichsangiz, konsultatsiyada ayting: u koʻkarish ehtimolini oshiradi;
- muolajadan bir kun oldin spirtli ichimlik ichmang;
- avval botoks qilgan boʻlsangiz, qachon va qaysi preparat bilan qilinganini eslab keling.
Natija qachon koʻrinadi va qancha saqlanadi
Taʼsir odatda 3-7 kunda seziladi, toʻliq natija taxminan 2 haftada koʻrinadi. Mushak harakati odatda 3-4 oydan keyin asta-sekin qaytadi. Bu muddat zona, doza, mushak kuchi va organizmingizga bogʻliq.
Botoks kurs bilan qilinmaydi: bir marta qilinadi, harakat qaytgach takrorlanadi. Ikki muolaja orasida kamida 3 oy boʻlishi kerak, Dysport yoʻriqnomasida ham shunday yozilgan.
Natijani birinchi kunlarda baholamang: taʼsir asta-sekin kuchayadi. Shuning uchun nazorat koʻrigini aynan 2 haftaga belgilaymiz.
Botoksni biorevitalizatsiya, filler va boshqa inʼeksiyalar bilan birga rejalashtirish mumkin. Qaysi biri birinchi va oraligʻi qancha boʻlishini kosmetolog umumiy rejaga qarab belgilaydi.
Maqsadimiz yuzni «qotirish» emas. Dozani ajinlar yumshaydigan, mimika esa qoladigan qilib tanlaymiz: kulasiz, hayron boʻlasiz, faqat peshonadagi chiziqlar chuqurlashmaydi. Natija har kimda har xil boʻladi.
Botoksdan keyin nima qilish mumkin emas
Birinchi kuni eng muhimi: preparat yuborilgan joyidan siljimasligi kerak. Quyida odatiy tavsiyalar, aniq roʻyxatni muolajadan keyin beramiz.
- 4 soat yotmang va boshingizni pastga egmang;
- inʼeksiya joylarini ishqalamang, bosmang va uqalamang;
- bir sutka sauna, hammom, issiq vanna va ogʻir sportdan voz keching;
- muolaja kuni spirtli ichimlik ichmang;
- 2 hafta yuz massaji, piling va chistka qilmang.
Odatiy reaksiyalar: qisqa vaqtli boʻrtiqlar, baʼzan kichik koʻkarish yoki yengil bosh ogʻrigʻi. Ular oʻz-oʻzidan oʻtib ketadi. Kamdan-kam hollarda qosh yoki yuqori qovoq vaqtincha pastga tushishi mumkin. Shunday boʻlsa yoki biror oʻzgarish sizni bezovta qilsa, klinikaga qoʻngʻiroq qiling.
Kimlarga botoks qilish mumkin emas
Botulotoksin retsept bilan beriladigan dori, shuning uchun muolaja faqat konsultatsiyadan keyin qilinadi. Quyidagi hollarda botulinoterapiya qilinmaydi yoki keyinga suriladi:
- homiladorlik va emizish davri;
- 18 yoshgacha;
- miasteniya, Lambert-Iton sindromi va nerv-mushak oʻtkazuvchanligining boshqa buzilishlari;
- inʼeksiya zonasida yalligʻlanish yoki infeksiya;
- botulotoksin yoki preparat tarkibiga allergiya (Dysport uchun sigir suti oqsiliga allergiya ham);
- isitma va oʻtkir kasallik davri.
Aminoglikozid guruhidagi antibiotiklar yoki nerv-mushak oʻtkazuvchanligiga taʼsir qiladigan boshqa dorilarni qabul qilayotgan boʻlsangiz, oldindan ayting: bu doza va muolaja vaqtini tanlashga taʼsir qiladi.
