Yuz chistka nima va nima beradi
Chistka poralarga tiqilib qolgan narsani chiqaradi: qora nuqta, yopiq komedon, qotgan teri yogʻi. Kosmetolog terini yumshatadi, tiqinlarni steril asbob yoki apparat bilan chiqaradi, soʻng niqob bilan tinchlantiradi. Natijada teri silliqroq, rangi tiniqroq boʻladi, poralar esa kamroq koʻzga tashlanadi.
Qora nuqta kir emas. Bu pora ogʻzidagi teri yogʻi, u havoda oksidlanib qorayadi, shuning uchun yuvinish yoki skrab uni toʻliq ketkazmaydi. Yopiq komedon esa teri ostidagi oq tiqin: uni uyda siqsangiz, dogʻ yoki chandiq qolishi mumkin.
Tozalangan teriga parvarish vositalari odatda yaxshiroq singadi. Shuning uchun chistka koʻpincha piling kursi yoki yuz parvarishi oldidan qilinadi.
Chistka ajinlarni ketkazmaydi va yalligʻlangan akneni davolamaydi. Yalligʻlanish boʻlsa, avval uni tinchlantiramiz, tozalash undan keyin.
Kimga mos va qachon kutgan maʼqul
Chistka qora nuqta, yopiq komedon va kengaygan poralari bor teriga kerak. Koʻpincha bu yogʻli va aralash teri, ayniqsa T-zona: peshona, burun va iyak. Quruq teri ham vaqti-vaqti bilan tiqiladi, lekin unga chistka kamroq kerak boʻladi.
Chistka qachon foyda beradi:
- burun, peshona va iyakda qora nuqtalar boʻlsa;
- teri ostida mayda oq doʻmboqchalar (yopiq komedonlar) boʻlsa;
- teri xira, notekis boʻlib, krem singmayotgandek tuyulsa;
- muhim tadbirdan bir necha kun oldin;
- orqa va yelkada komedon boʻlsa: buning uchun alohida orqa chistka bor, erkaklarga ham mos.
Teri yalligʻlangan, quyoshda kuygan yoki biror teri kasalligi qoʻzigan boʻlsa, chistkani keyinga qoldiramiz. Toʻliq roʻyxat pastda.
Qaysi chistka sizga mos: 5 usul
Eng samarali chistka teringizga mos kelgani. Zich komedonlarni qoʻlda tozalash yaxshiroq chiqaradi, sezgir yoki suvsizlangan teriga esa apparat yumshoqroq. Klinikadagi besh usul chuqurligi, yumshoqligi va tiklanish vaqti bilan farq qiladi:
| Usul | Qanday ishlaydi | Kimga mos | Tiklanish |
|---|---|---|---|
| Mexanik (qoʻlda) | Komedonlar steril asboblar bilan chiqariladi | Zich komedon, yogʻli teri | 1-2 kun qizarish |
| Qirollik tozalash | Bir necha bosqichli kengaytirilgan tozalash | Tiqilgan poralar, xira teri | Odatda 1-2 kun |
| Aquapure | Suv va vakuum bilan tozalash, soʻng parvarish | Kengaygan poralar, suvsizlangan teri | Odatda yoʻq yoki bir necha soat |
| Glacé | Mikrodermabraziya, zardob singdirish, vakuum massaj | Sezgir, quruq, xira teri | Odatda yoʻq |
| Orqani tozalash | Yumshatish, tozalash, antiseptik, niqob | Orqa va yelkadagi komedonlar | 1-2 kun qizarish |
Qoʻlda va apparatda tozalashning asosiy farqi chuqurlikda. Apparat teri yuzasidagi yogʻ va oʻlik hujayralarni yaxshi olib tashlaydi, chuqurdagi yopiq komedonlarni esa odatda qoʻlda chiqarishga toʻgʻri keladi.
Qirollik tozalash bir necha bosqichdan iborat: odatda yuvish, yengil piling, qoʻlda chistka va teri turiga mos niqob. Aniq tarkibini kosmetolog teringizga qarab belgilaydi. Glacé apparatini amerikalik Candela kompaniyasi ishlab chiqaradi: olmos uchli bir martalik nasadka terini yengil silliqlaydi, soʻng zardob singdiriladi va vakuum massaj qilinadi.
Qaysi usulni tanlashni bilmasangiz, kosmetolog koʻrigiga yoziling.
Yuz chistka qanday qilinadi
Har qanday chistka koʻrikdan boshlanadi va tinchlantiruvchi parvarish bilan tugaydi. Qoʻlda tozalash biroz noqulay, ayniqsa burun atrofida, lekin istalgan payt tanaffus soʻrashingiz mumkin. Aquapure va Glacé apparatida muolaja ancha yumshoq seziladi.
Qoʻlda tozalash shunday oʻtadi:
- Koʻrik. Kosmetolog teri turini, toshmalarni va qarshi koʻrsatmalarni tekshirib, usulni tasdiqlaydi.
- Yuvish. Makiyaj va ortiqcha yogʻ yumshoq vosita bilan olib tashlanadi.
- Yumshatish. Teri bugʻ yoki maxsus vosita bilan yumshatiladi, shunda tiqinlar oson chiqadi.
- Tozalash. Komedonlar steril asboblar bilan chiqariladi.
- Antiseptik. Tozalangan joylarga ishlov beriladi.
- Niqob. Teri turiga mos niqob qizarishni kamaytiradi, terini namlantiradi.
Aquapure va Glacé muolajasida komedonlar qoʻlda siqilmaydi: terini apparat tozalaydi, keyin parvarish vositalari singdiriladi. Oxirida kosmetolog uyda qanday parvarish qilishni aytib beradi.
Chistkaga qanday tayyorlanish kerak
- bir necha kun oldin skrab, kislotali va retinolli vositalarni toʻxtating;
- muolaja oldidan quyoshda toblanmang va solyariyga bormang;
- labda uchuq chiqsa yoki teri yalligʻlansa, qoʻngʻiroq qilib vaqtni koʻchiring;
- makiyaj bilan kelsangiz ham boʻladi, uni klinikada olib tashlaymiz.
Natija qachon koʻrinadi va necha marta qilish kerak
Poralar muolajadan keyinoq toza boʻladi. Qoʻlda tozalashdan keyingi qizarish va mayda izlar odatda 1-2 kunda ketadi, apparatdan keyin koʻpincha bir necha soatda. Muhim tadbir boʻlsa, qoʻlda yoki Qirollik tozalashni 2-3 kun oldin, Glacé yoki Aquapure muolajasini esa bir kun oldin rejalashtirgan maʼqul.
Natija qancha saqlanishi teri turi va uy parvarishiga bogʻliq. Yogʻli terida poralar bir necha haftada yana toʻla boshlaydi, shuning uchun bunday teriga chistka odatda 1-2 oyda bir marta qilinadi. Normal va quruq teriga kamroq kerak, muddatni kosmetolog aytadi.
Kurs shart emas, bitta seans ham natija beradi. Teri uzoqroq toza tursin desangiz, chistkalar orasida piling qilish mumkin: u teri yuzasini yangilaydi va poralar qayta tiqilishini sekinlashtiradi.
Uyda uchta odat yordam beradi: poralarni tiqmaydigan (nokomedogen) krem va tonal vosita tanlash, kuniga ikki marta yumshoq vosita bilan yuvinish va yostiq jildini tez-tez almashtirish.
Chistkadan keyin parvarish
Chistkadan keyingi 2-3 kun teri sezgir boʻladi, tozalangan poralar esa oson ifloslanadi. Shu kunlarda terini issiq, ter va kuchli vositalardan asrang: qizarish tezroq ketadi, yangi toshma chiqish ehtimoli kamayadi.
Chistkadan keyin nima qilmaslik kerak:
- birinchi kuni makiyaj qilmang va yuzni qoʻl bilan ushlamang;
- 2-3 kun hammom, sauna, basseyn va ogʻir sport mashgʻulotlariga bormang;
- skrab, kislotali va retinolli vositalarni kosmetolog ruxsat bermaguncha ishlatmang.
Nima qilish kerak:
- har kuni quyoshdan himoya kremi surting, Toshkent quyoshida bu ayniqsa kerak;
- yuzni yumshoq vosita bilan yuving, sochiq oʻrniga bir martalik salfetka ishlating.
Chistkadan keyin 1-3 kun ichida bir-ikkita mayda toshma chiqishi mumkin: koʻpincha bu chuqurroqda qolgan tiqinlar. Ularni siqmang. Toshma koʻp boʻlsa yoki ogʻrisa, kosmetologga yozing.
Qarshi koʻrsatmalar
Teri yalligʻlangan yoki shikastlangan boʻlsa, chistka qilinmaydi: tozalash yalligʻlanishni kuchaytirishi va infeksiyani tarqatishi mumkin. Avval teri tinchlanishi kerak, keyin kosmetolog usulni qayta tanlaydi.
Muolaja quyidagi holatlarda keyinga suriladi:
- labda yoki yuzda faol gerpes (uchuq);
- akne qoʻzishi, yiringli toshmalar;
- rozatsea yoki kuperoz qoʻzishi;
- ekzema yoki dermatit qoʻzishi;
- ochiq yara yoki tirnalgan joy;
- yangi quyosh kuyishi.
Aquapure uchun qoʻshimcha cheklovlar: kardiostimulyator yoki boshqa elektron implant, homiladorlik, ishlov beriladigan sohada metall implant. Bunday holatda boshqa usul tanlanadi. Dori ichayotgan yoki teriga dorili vosita surtayotgan boʻlsangiz, koʻrikda albatta ayting.
